"Li khinhoann" hou taigu-bang e phoe: 建構台灣人e5 集體記憶
---228 五十五週年紀念 李勤岸 （ti7 波士頓228和平日紀念會講） 各位敬疼e5 台灣同鄉，各位兄弟姊妹：大家午安，大家好！ 今仔日咱聚集ti7 chia ，抱著沈重e5 心情beh 來紀念228五十五週年。我beh 用『建構台灣人e5 集體記憶』來參大家做夥三思228 e5 本質kap 意義，向望透過對228 進一步e5 認捌，會當深化咱台灣人e5 族群意識kap 國家意識。
首先，我beh 來宣讀一份七人e5 名單：

陳炘 日本慶應大學理財科畢業；美國哥倫比亞大學經濟系畢業
施江南 日本京都大學醫學博士
李瑞漢 日本中央大學法科畢業
郭章桓 日本慶應大學醫學院外科畢業
王育霖 日本東京帝國大學法科畢業
陳澄波 日本東京美術學校畢業
林茂生 日本東京帝國大學畢業；美國哥倫比亞大學教育哲學博士 以上所列，真成是teh 發布台灣政府內閣主要部會首長e5 名單。以In e5 資歷，In e5 才華，In e5 名望，會當組成一個世界一流e5 新內閣。可惜，歷史不但無hou7 In去發揮In會當貢獻hou7 國家e5 專長，顛倒轉，In去hou7 一個世界無水準e5 政府無緣無故屠殺掉。尤其諷刺e5 是，當時In攏真熱誠認同彼個所謂『祖國』 政府，幻想beh 回歸『祖國』e5 懷抱。In無想到脫離日本殖民，m7 是『光復』，卻是再度淪陷入去另外一個帝國e5 再殖民。短短一冬四個月，228大屠殺就來發生。短短10外工時間，被屠殺死亡e5 人數，確實偌濟，到旦無人清楚。保守估計，有數萬人左右。若是根據93年美國國家地理雜誌(National Geographic) Ḿ 調查報告，大約有四萬人。 228 e5 經過：
1945 年8月15日日本戰敗投降，中國ti7 10月17日 派兵五千佔領台灣。47年2月27日，中國軍事政府專賣局查緝私煙，ti7 台北太平町附近取締賣薰e5 寡婦林江邁，沒收所有e5 薰，koh ka7 伊身軀所有e5 錢攏提去，這個生活困苦e5 婦人人苦苦哀求，煞hou7 人用槍頭mai kah 頭殼流血昏倒在地，旁觀e5 人看無做得，大聲喝拍，專賣局e5 人一面走一面開槍，toaN7 死路人陳文溪。群眾愈來愈憤怒，包圍警察局憲兵隊，要求交出兇手。隔工，2月28日，人民開始罷工罷課遊行示威，中國政府開機關槍掃射。事件開始擴大。後來台灣社會精英及民間領袖組成228處理委員會，一方面an-tah群眾，一方面向中國陳儀政府交涉，要求政治改革。陳儀一方面應付『處委會』，騙講be7 ui3 中國調兵來，一方面已經向蔣介石請求軍隊。3月初9，中國軍隊21師登陸基隆。開始大屠殺。 228 e5 本質是啥物？ 228 m7 是一個事件，228是大屠殺。228 m7 是incident,m7 是一個事件，koh khah m7 是accident,m7 是意外事件。伊是歷史e5 必然，無發生ti7 二月底，嘛會發生ti7 三月底，無發生ti7 彼工，嘛會發生ti7 別工，緊差慢，伊總是會發生。228 be7 使講是事件，be7使講是incident,伊是參人類ti7 世界其他所在發生e5 massacre, genicide, holocaust 仝款，是massacre,是屠殺，是genicide, 是種族屠殺，是holocaust,是集體屠殺。228 本質上是一個族群去侵略另外一個族群ˆ 大屠殺。
本質上，對中國人來講，彼是一場戰爭。是對日抗戰e5 延續。中國人ti7 中國hou7 日本人欺負、佔領、屠殺，In來台灣是來『接收』，台灣當時是日本e5 領土，台灣人是日本人，In是軍事佔領台灣，Inti7 十外工屠殺數萬人，基本上In是當做戰爭e5 延續，是對日本人報仇。Ti7 這場戰爭中，可惜，台灣人並無正規軍，台灣人有e5 不過是正義感、不過是不滿、不過是憤怒。台灣人誤以為家己是中國人，誠心誠意teh 歡迎家己e5同胞，結果m7 知影家己無hou7 人當做中國人，無hou7 人當做同胞，卻hou7 人當做日本人，hou7 人當做戰爭報仇e5 代罪羊羔、成做犧牲品。
Ti7 這場莫明奇妙e5 戰爭中，台�! W人犧牲性命e5 數萬人內底，有三款人。第一款是台灣人e5 菁英分子，有e5 是議員，有e5 是智識分子，有e5 是醫生、律師，是作家、畫家，In攏ti7 屠殺e5 名單內底。中國軍事政府是根據名單去掠人銃殺e5 。第二款是有真正抗戰e5 ，有參戰e5 。Ti7 中部埔里e5 二七部隊，其實是台中商專，台中師專e5 學生kap 維持治安e5 民間自衛隊所組成，真正參中國軍正面戰爭e5 時間干單四工，就無法度抵擋，宣佈解散（3/12~16）。Ti7 高雄，高雄一中e5 學生、高雄女中e5 學生嘛是抗暴四工 (3/3-6) 就全部hou7 人消滅。第三款人上濟，攏是無辜e5 百姓，ti7 中國軍隊登陸四界屠殺中白白喪生。

228 e5 意義？ 咱攏是228受難者
嚴格講起來，全体台灣人攏是228受難者。228以後，續落來開始『清鄉』、白色恐怖，台灣人自按呢ti7 完全無人權、無自由e5 特務統治之下過五十幾冬，雖然性命無喪失，不過除了性命以外，喪失去e5 物件實在太濟太濟，講起來，除了悽慘e5 228遺族以外，所有e5 台灣人攏嘛會使講是228 e5 受難者。
Koh 進一步講，除了有形e5 軍事228以外，中國政權ti7 台灣所實施e5 語言政策，是屠殺台灣人所有母語e5 另外一個228大屠殺。用屠殺語言文化來達成伊軍事228無完成e5 部分，也就是滅種。ka7 你e5 族群母語消滅掉，就會當達到消滅整個族群，達到滅種e5 目的。台灣一向實施e5 ，到旦嘛猶未廢除e5 ，就是中國語為國語e5 語言政策。這個政策最後就是beh 消滅母語。前三工，2 月21日，是世界母語日。聯合國教科文組織（UNESCO)公布一份報告，講現主時世界上現存e5 6000 e5 語言，有一半瀕臨滅種。其中特別提著台灣，講台灣原本所有e5 23種本土語言，收著華語e5 威脅，不久e5 將來就會消失，ti7 地球消失。按呢講，咱其實攏是228 e5 受難者，準講m7 是軍事228 e5 受難者，嘛是語言228 e5 受難者。 228是咱e5 集體創傷，需要集體治療 一個人若有創傷就需要治療，心理e5 創傷需要心理治療。228 e5 創傷，是台灣人集體e5 心理創傷，be7 當干單向前看，m7 轉去看彼個傷口，be7 當一直ka7 伊deny,親像早前中國政府e5 做法按呢，ka7 伊否認，不準你知影伊e5 存在，知影就犯罪，就有危險。deny 是人類對付心理創傷真容易採取e5 方法，不過，這款方法be7 當治療彼e5 創傷。另外一個態度就是ignore,雖然無去ka7 伊否認掉，不過是ka7 伊忽略，有當做無，這就是咱chhiaN5-chhiaN5 用來安慰家己e5, 講號做『向前看』。講『向前看』是khah 好聽，其實這就是ignore e5 態度。Ignore be7 當治療，be7 當解決問題。
今仔日咱講起228大屠殺發生e5 代誌，m7 是beh 來怨恨甚麼人，m7 是無beh 原諒，是beh 得著治療。台灣人e5 集體創傷需要集體做夥勇敢去面對，去瞭解，然後得著治療。

228是咱共同 e5 集體記憶，需要咱做夥來建構 咱今仔日聚集ti7 chia,m7-tiaN beh 集體治療咱228 e5 創傷，咱猶beh koh khah 積極建構咱台灣人e5 集體記憶。228大屠殺了後，hou7 人úE無了e5 台灣人，一方面大著驚，另外一方面煞清楚家己是台灣人，m7 是中國人，煞產生無beh 永遠hou7 人殖民，產生beh 家己當家做主，beh 家己有家己e5 國家e5 信念。這個信念是犧牲數萬人e5 性命才換來e5 。這個信念建立ti7 228 大屠殺頂高。做一個台灣人，無管你ti7 世界 e5 叨一角落，只要你是台灣人，當頭見面，免講話，腦內底咱這個共同e5 集體記憶就會互相對話，就會真親，真疼惜對方，因為你有228 e5 創傷，我有228 e5 創傷，咱有共同e5 一個集體記憶。 親像猶太人，見面就有In e5 舊約故事e5 共同記憶，koh 有In被德國人集體屠殺e5 holocaust e5 共同記憶。這款e5 共同記憶需要不斷去強調，用儀式，用藝術，用詩歌，用小說、用戲劇，用電影不斷去講起，不斷去紀念。M7 是beh 怨恨，m7 是無beh 原諒，是beh 進一步hou7 咱台灣人有共同e5 記憶，會當形成咱台灣人共同一致e5 性命意識 kap 國家意識。勇敢做夥防止任何形式e5 228 ti7 台灣koh 再發生。記憶是一個族群通向救贖e5 不二法門；若是放hou7 be7 記得，最後e! 5 結果就是是自我放逐，就是自暴自棄e5 絕望。今仔日咱ti7 chia 紀念228，我用『建構台灣人e5 集體記憶』來參大家做夥勉勵。多謝各位。

MSN 相簿提供您最簡單的方式分享並列印您的相片，請按這裡。