Tak-ke ho: I-ha si Iau Chi-liong sian-siN hong-mng Ng Se-chhoan bok-su e bun-ko. Hak-khiam 70 Nî Chêng ê Kò͘-sū 2004.07.26 Iâu Chì-liông Hóng-būn N̂g Se-chhoan Bo̍k-su o̍h Pe̍h-ōe-jī ê kòe-thêng. Kin-nî góa 87 hòe ah! Ji̍t-pún sî-tāi góa tha̍k ko-tiong pi̍t-gia̍p í-chêng chiū li̍p-chì beh chò thôan-hok-im ê sū-kang, chham-ka Tâi-pak Sîn-ha̍k-īⁿ ê ji̍p-ha̍k khó-chhì, chin kám-siā Chú góa ê sêng-chek khó-liáu koh bē-bái, chū án-ne khai-sí tī Tâi-pak Sîn-ha̍k-īⁿ tha̍k-chheh.

Tī góan hit tong-sî Ki-tok-kàu ê ka-têng lóng ē-hiáu tha̍k Lô-má-jī ê Sèng-keng, ji̍p-ha̍k chiah chai ha̍k-hāu bô khui Pe̍h-ōe-jī ê khò-thêng, góa iá-koh bē-hiáu tha̍k--leh khòaⁿ-bô, mā tha̍k-bô, sim-lāi chiâⁿ tio̍h-kip teh chhiâu-chhōe ki-hōe beh kóaⁿ-kín ha̍k-si̍p LMJ, chin tú-hó kap góa tòa tī ha̍k-liâu kâng-keng ê tông-ha̍k, i ê miâ kiò “Tēⁿ Liân-tek” (Aū-lâi i ū tī Kàu-hōe bo̍k-hōe.) Hit-chūn i í-keng chin gâu tha̍k--ah i koh chiok hoaⁿ-hí beh kà góa tha̍k Pe̍h-ōe-jī, put-sî kā góa kó͘-lē Pe̍h-ōe-jī chin kán-tan m̄-bián hôan-ló.

Chin-kín iá-bōe khai-ha̍k ê sî tō khai-sí kà góa tha̍k LMJ, hit-chūn góa bô LMJ ê khò-pún thang tha̍k sī ēng Pe̍h-ōe-jī ê Sèng-keng chò kàu-kho-su, in-ūi góa í-keng ū Eng-gí ê ki-chhó͘--ah, tùi chiah-ê jī-bó, chú-im “b ch chh” bē chheⁿ-so͘, kan-nā tī hoat-im tha̍k chhut chhùi ê sî chhiāⁿ-chhiāⁿ hut m̄-tio̍h khì, bô kúi pái ê liān-si̍p tō chin chū-jiân, kám-kak bē chiok khùn-lân, góa ê tông-ha̍k tō ēng Sèng-keng kà góa kán-tan ê piàn-im, chin kín góa tō sa-tio̍h-cháng ah! Ē-hiáu Eng-gí koh lâi o̍h siá, o̍h tha̍k LMJ chi̍t-sut-á lóng bô mâ-hôan ê só͘-chāi, kan-taⁿ tī chù-im ê sî kah chia̍p siá m̄-tio̍h, lóng-ē chiàu lán kóng-ōe ê hong-sek lâi chù-im. Chit-ūi bián-hùi ê sió lāu-su ēng chin chū-jiân ê hong-sek hō͘ góa tùi m̄-bat Pe̍h-ōe-jī kàu ē-hiáu tha̍k, ē-hiáu-siá, góa ê sim lāi chin-chiàⁿ chhiong-móa kám-siā, chin to-siā i chhōa góa ji̍p-mn̂g, hō͘ góa í-āu tī Kàu-hōe ê bo̍k-hōe ū chin hó ê pang-chān, hit-chūn ê siā-hōe m̄-bat Hàn-jī, m̄-bat tha̍k-kòe chheh ê lâng ke-kiám lóng ē-hiáu tha̍k Sèng-si (kui-pún Sèng-si 100% ê LMJ m̄a bô ìn kán-phó͘,) tī kàu hōe ê lé-pài tāi-ke lóng chhiùⁿ kah chin hó-sè, khah jīn-chin khah iōng-sim ê hōe-iú tō ū hoat-tō͘ kā Sèng-keng tha̍k-kah chin ku̍t-liu, che chiū-sī góa tī iá-bōe 20 hōe hit-chūn o̍h Pe̍h-ōe-jī ê keng-kòe. Chin hó-kai-chài tòa-tī ha̍k-liâu ê sî, góa ū tú tio̍h chin hó ê Tēⁿ tông-ha̍k kà góa LMJ, tī lī-khui ha̍k-hāu ê sî hō͘ góa koh lú hoat-hiān tio̍h, ē-hiáu Pe̍h-ōe-jī ê tiōng-iàu-sèng, Tēⁿ tông-ha̍k ló͘-lat--o͘h! Ps: N̂g Se-chhoan Bo̍k-su kap i ê hū-jîn-lâng hiān-chú-sî thè-hiu..a, tòa tī Ko-hiông lī Hōng-soaⁿ chin kīn ê só͘-chāi, lóng sī Chú ê thiàⁿ-thàng kap pó-siú, N̂g Bo̍k-su nî-kí iā í-keng 87 hòe ah sin-thé koh chin khong-kiān.
---