ISO 639-3 ê gígiân tāihō

From: Phokgoân
Date: 2007-02-16 16:23:57

Choân sèkài ê gígiân tāibé, lóng kuitēng tī ISO 639 code table lāibīn. ISO 639, hun kúinā ê pánpún. Ū ISO 639-1, 639-2. M̄koh, sèkài siōng ê toā pō͘hūn gígiân, sī kàu ISO 639-3, chiah chèngsek lia̍t chhut.http://www.sil.org/iso639%2D3/codes.aspTéngbīn ê bāngia̍h tio̍hsī ISO 639-3 ê tāihō lia̍tpió. Kîtiong, lán ê gígiân, hunphoè tio̍h ê tāihō sī "nan". Ta̍kke ētàng khì khoàⁿ < http://www.sil.org/iso639%2D3/documentation.asp?id=nan >. Tāihō sī "nan", choânmiâ sī "Min Nan Chinese".Ta̍kke èngkai lóng chaiiáⁿ Tâibûn ū soàⁿténg pekkhochoânsu, Holopedia. M̄koh hūchek Holopedia ê Uiki-mûithé, kàu taⁿ iáu sī siattēng Holopedia ê bānglō͘ subdomain chò "zh-min-nan". Tio̍hsī, "zh (Zhongwen, Chinabûn)" ēkha ê "min(bân)" ēkha ê "nan" ê ìsù (中-閩-南). Goá kámkak suijiân chit ê "zh-min-nan" sī kài kú íchêng tēng ê, m̄koh kap chitmá Uiki-mûithé ê kuitēng, íkeng bôkâng (tio̍h chhinchhiūⁿ Hokchiugí ê Uiki-pekkho, súiōng ê miâ tio̍hsī ISO 639-3 kuitēng ê "cdo", m̄sī "zh-min-tong (中-閩-東)"). Ánne si̍tchāi chin bô kongpêⁿ. Só͘í goá kūnî tio̍h khì < http://bugzilla.wikimedia.org/show_bug.cgi? id=8217 > kiàngī kā miâ kái koèlâi, m̄koh thoa chiahni̍h-á kú, kàu taⁿ iûkoh bô lâng chhap ah! Hibāng ū lâng ētàng khìli̍h tàu kóng, bô nā lóng goá itti̍t kohchài kā koáⁿ, kiaⁿ koánlíoân khoàⁿtio̍h mā hoân.Lēnggoā goá ū 1 ê siūⁿhoat -- Lán Kokka Tâibûnkoán lāi, ū kúinā pah pún chheh, m̄chaiiáⁿ kám ētàng iōng ánne chò líiû, khì sinchhéng "Taiwanese" kaji̍p ISO 639 (nāchún ISO 639-3 iáuboē tēngkó, hoānsè ētàng koh kaji̍p khì lāibīn)? Tâigí kaji̍p ISO 639 ê chèngtongsèng choa̍ttùi pí chin choē íkeng tī lāité ê gígiân kohkhah kiông! Tâigí chit pah tang lâi ū chhut chin choē chheh (chin choē gígiân to̍h bô); chit chióng bûnjī iōng tiānnáu koh ētàng chhúlí (chin choē gígiân mā bô); jîchhiáⁿ ISO 639 lāi koh ū chitkoá gígiân bêngbêng siokâng koh inūi chèngtī insò͘ hunchò 2 chióng! Tâigí kap Bânlâmgí píkhí thâutúá kóng ê hit ê lē, chá tio̍h íkeng ū chin toā ê chhapia̍t, si̍tchāi bô èngkai koh kap "zh-min-nan" chitkhoán miâ tī hia teh kôkôtîⁿ!Ísiōng 2 kiāⁿ tāichì. Tē 1 hāng khólêng khah kántan, hibāng ta̍kke tàusaⁿkāng. M̄koh tē 2 hāng goá si̍tchāi m̄chaiiáⁿ ánchoáⁿ chò, só͘í siá lâi chia. Ta̍kke bóng chhamkhó. Pēngchhiá chiok ta̍kke sinnî khoàilo̍k, sinthé kiānkhong!!Phokgoân, Jīgoe̍h 16, 2007

Re: Re: ISO 639-3 ê gígiân tāihō

From: Phokgoân
Date: 2007-02-16 23:27:04

Ta̍kke hó, Babuza Isu lí hó,Goá kámkak chin pháiⁿsè. Goá chitmá khoàⁿ goá kináji̍t phah ê bûnchiuⁿ, kámkak siá liáu chin bô chhengchhó. Khólêng ē hō͘ ta̍kke gō͘hoē, chin tùiputchū. Goá koh kántan pó͘chhiong káisoè chi̍tē…Kináji̍t goá siá ê bûnchiuⁿ chúiàu sī teh kóng 2 hō͘siong ū koanhē, m̄koh sī bôkâng ê tāichì.Tē 1 kiāⁿ tāichì, sī hibāng iaukiû koánlí Holopedia ê Uiki-mûithé, kā "zh-min-nan" ê tāihō káichò ISO 639-3 chèngsek ê "nan". Tē 2 kiāⁿ tāichì, sī hibāng nāchún lán ētàng ū lâng khì Kokchè Gígiân Ha̍khoē (SIL), sinchhéng Tâigí chò 1 chióng gígiân, inūi chitmá ê chèngsek hunlūi iáusī "nan (Min Nan Chinese)".Tē 1 hāng ê pō͘hūn, ētàng khahkín chò, sī inūi Uiki-mûithé ê kuichek, tio̍hsī í ISO 639 kuitēng ê tāibé ûichú. Suijiân tongchhoesî sinchhéng iáu bô tāibé, m̄koh kìjiân āulâi ū ah, to̍h èngkai kái koèlâi, bô bêngbêng ū tāihō náū siá chò "zh-min-nan" ánne lohlohtn̂g ê tōlí? Tī kîthaⁿ gígiân pán ê Wikipedia, goá khoàⁿ mā bô chit khoán chênghêng…M̄koh, nāchún beh kā Holopedia hia ê tāihō káichò Tâigí, khólêng in mā bô hoattō͘. Inūi, Uiki-mûithé lóngsī chiàu ISO 639 ê chuliāu kap tāihō lâi siat ê. Kā in kàisiāu lán ê gígiân, khólêng in mā boē chhap. M̄koh "zh-min-nan" káichò "nan", he sī in ittēng ài chhap ê, inūi "nan" chiah sī ha̍p in ê kuitēng ê chohoat. "Zh-min-nan" ê siáhoat, bô ha̍p kuitēng, mā bô kongpêⁿ.To̍h inūi ánne, goá chiah ē ū tē 2 hāng ê kiàngī. Goá jīnûi nā lán ētàng ùi ISO ê gígiân hunlūi siōng hun chhutlâi, tio̍h m̄bián koh hām chia ê Bînkok chhoenî hia ê giánkiù liáu bô thàu ê "Hàngí ha̍kka" hoatbêng ê chhògō͘ hunlūi kap miâsû tī hia teh kôkôtîⁿ. Jîchhiáⁿ Tâigí beh kaji̍p, chèngtongsèng ittēng kàu. Tâigí kap "Min Nan Chinese", chá tio̍h bô kâng. Jîchhiáⁿ íkeng tī ISO 639-3 ê chin choē gígiân, kinpún tio̍h chiapkīn sīnchì íkeng síbông! Tâigí ū bûnjī, ū kó͘chheh, pí kîthaⁿ chiok choē gígiân lóng khah gâu ah!Só͘í nāchún lán ū kakī ê gígiân tāihō, kinpún tio̍h khì sinchhéng 1 ê sin ê Uiki-pekkho pánpún tio̍h hó. Mā bián tī chia tánthāi koánlíoân káichò "nan", koh siū i ê khì ah. Chísī, kaji̍p ISO ê tāichì, goá mā m̄chaiiaⁿ ài ánchoáⁿ chò. Chiah siūⁿ tio̍h lâi chia sūnsoà mn̄g.Che goânté sī 2 hāng tāichì, goá chìnchêng siá liáu bô chhengchhó, chin sitlé! Ia̍h hibāng goá ê pó͘chhiong, Ta̍kke khoàⁿ liáu, ētàng koh khah liáukái ah! ^^ Mā kámsiā Babuza Isu, chiah kín to̍h kā goá hoê :)

Phokgoân, Jīgoe̍h 16, 2007