[大人囡仔詩] 69

阿爸 ê 遺傳

m̂寫hō͘ 阿爸ê詩 7 之七

阿爸中風了後 我開始食一款藥仔 一粒 81 毫克ê 阿斯匹靈 嬰兒分量ê阿斯匹靈 醫生講一工食一粒 會-tàng 預防中風 我需要拒絕阿爸ê 遺傳 我ná-像逐項攏遺傳著阿爸 古意kah有點仔查某體 足gâu 歹勢 不時面紅-kòng-kòng 我國校ê 時hō͘ 人叫『小姐』 是一個查某老師kā 我號ê 全班攏按呢kā 我叫 後來，我參每一個叫我『小姐』ê 囡仔 相拍 拚命相拍 拍kah無人koh 敢叫我『小姐』 拍kah全班叫我『大哥』 我mā 遺傳阿爸ê 大舌 講話足頇慢 逐句話攏tī 嘴裡旋幾若liàn 才來到嘴邊 thi-thi thuh-thuh 吞吞吐吐 一直到高中猶按呢 高二ê 時做副班長 逐擺班會起去講臺報告 無人聽有我teh 講啥 我家己mā m̄ 知teh 講啥 後來，我決心beh 家己矯正 我 ê 嘴舌 逐早起，我kā 嘴舌 當做我 ê 身軀 面向東方做軟身運動 彎腰，khi正旁 伸直，khi倒旁 倒 leh，坐--起來 仆leh， 撐--起來 跳--起來，拍一個phoak-仔 one more, two more 同時大聲 o-ló 上帝 chit-má，我已經會-tàng 四界去演講 我mā 遺傳阿爸ê 急性 阿爸差不多腦筋想著啥貨 腳手to jiáu pè-pè 一直去 無管三七二十一 一直犁一直去 親像戇牛teh 犁田 我到大學， mā 猶是彼號火狂性 後來，我去學 lòng-球改性地 學kah 會曉球步算三步 每粒球，先相到真真真 才輕輕仔撞出去 m̄-koh ，我 m̄ 知beh 按怎拒絕 阿爸 ê 遺傳 阿爸中風 ê 遺傳 我是beh 按怎拒絕？ mài 食siuⁿ 油 ? 阿爸一世人散phí-phí 無食著甚物油仙 mài 食siuⁿ 好? 食siuⁿ好『膽固醇』會siuⁿ高? 阿爸一世人無食過幾頓好頓 阿爸腦筋斷去 ˜ 知是甚物引起 chhōe 無原因 我m̄ 知beh 按怎拒絕 阿爸ê 遺傳 阿爸中風了後 我一方面開始一工食一粒 81 毫克 ê 阿斯匹靈 一方面，我開始認真思考 中風以後e5 生涯 beh 按怎規畫? --2003/5/25 Harvard

使用 MSN Messenger 與朋友在線上聊天 * * * * * * * * * * * * * * * * * * Li chu-chheh e e-mail khau-cho si: "Li khinhoann" . * Beh kia phoe ho' tak-ke tioh iong chit-e khau-cho chiah kia-e-kau. * * * * * * * * * * * * * * * * *