Kokūi hiaⁿ-ché,

Lômájī tah hit kúijī niā.

Goá sī Tâigílâng. Goá nā chin pn̄gtháng chi̍tji̍t tah o̍h oēhiáu chi̍tjī Lômájī niā. Jīsaⁿcha̍p ji̍t koè, goá to̍h ta̍kjī lóng o̍h oēhiáu loh, lâi to̍h chhun chhoēkihoē tiāⁿtiāⁿ tha̍k, tiāⁿtiāⁿ siá, chhun kāi liū hō͘ i se̍k, liū hō͘ i koànsì ê tāichì niā.

Goá m̄sī Tâigílâng, goá sī gíná. Nā ánne kannā o̍h choân Lômájī sīm̄sī pí o̍h choân Hànjī--ê a̍hsī Hànlô thàulām--ê kekhah kántan?

Chi̍tjī Hànjī tī Tiongbûn ū púnim mā khólêng iâuū "破音字". Chitjī Hànjī koh tī lán Tâioânoē tûliáu gúim liáuāu mā khólêng iâuū bûnim, chitmá iâu khólêng ài siⁿchhut chiokchoē lán chia "gâulâng" kiò lán ài sin tha̍k ê im. Chi̍tjījī ū chia̍hchoē im, chia̍hchoē ìsù a̍hsī kóng "意象". Sînkengkun ài chiok toātiâu. Ha̍khāu a̍hm̄sī kannā teh kà chi̍tchióng Tâigíkhò niā.

Ta̍kgêlâng ê kiáⁿ lóngsī pópoè, kà Lômájī kùikang to̍h kàoân, to̍h oētàng pàng hō͘ in khì chhitthô. Kóng o̍hliáu Lômájī liáuāu thiaukang kohchài lia̍hin lâi chi̍tjī Hànjī siá gō͘choā cha̍pchoā tah boh pàngin soah, ánne chiongkuibé sī siáng(siáⁿ-lâng) khah chânjím?

Hànjī bānbāná chhoē!

M̄thang kannā chhoē chi̍tkoá Hànjī-khak, kiatkó chi̍tkoá goânji ê chengsîn, lênghûn, bûnhoà, kenggiām … lóng bôkhì loh! Chesī teh kāng Tâigí ê kingoân chāmchāmtiāu, sī teh hāi Tâigí m̄sī teh chān lánê Tâigí.

Goá ánne kóng lí kiámboh siongsìn? Chhun chhoē "撿角" boh lâi hōng(hō͘-lâng)-ēng. "Khioh-ka̍k" sī khioh-hia-ka̍k, sī the̍h khì piⁿá chúnpī boh tàn hia ka̍k ê ìsù. "Khioh-ka̍k" sī kóng "pùnsò hitlūi ê mi̍hkiāⁿ" e ìsù. "Kak" ngēngē iōng 六書 lâi kāi káiseh chò "角落" a̍hsī "piⁿá" ūlâng oē chiapsiū, m̄koh "kak" choattùi m̄sī "ka̍k". Tùi chitgê gígiân m̄niā ài ū ha̍kbūn mā kàihó àiū hósim.

Khêngkàuchin(khêng-si̍t), khoàⁿtio̍h hia Hànjī tha̍k oē chhut Tâigí ê lâng sī pí hia siá ê lâng gâu, koh gâu kúināchheng poē.

Lômájī ēng hō͘ i koànsì! Hànjī bānbāná chhoē!

Lán Tâigí chitmá iōngsim kannā teh kà gíná niā, hāukó kiám hó? Lán nám̄ ko͘putjîchiong(姑不 …，而終 …。) khaisí a̍hkhì kokchngthâu, siākhu kà ūhoè ê lâng o̍h oēhiáu ēng Lômájī leh? Chi̍tgê ūhoē ê Tâigílâng to̍hsī chi̍tchō phongphài, chhiaiāⁿ ê Tâigi gísû ê chuliāukhò͘. Jîchhiáⁿ in chit-ûn ê lâng nā sí-oân, lán kàusî nākóng m̄ēng Tiongbûnhoà ê Tâioânoē mā bôkhólêng. Chitmá lâng to̍ksimto̍khēng teh kāng lán thoa, m̄chai sīm̄sī to̍hsī teh kiâⁿ chitpō͘ kî.

Hànjī m̄bián kiaⁿ o̍h bô. Toātoāsoèsoè ittēng àikoh o̍h chiokchoē tang--ê. Sin o̍h chi̍thāng mi̍hkiāⁿ sī chi̍tchióng chiok hoaⁿhí ê tāichì. Chiū lán Tâigílâng lâi kóng ēng Lômájī chísī chhoē chi̍tchióng hûhō lâi piáusī lán chá to̍h bat ê mi̍hkiāⁿ niā, chiok kántan! Chíiāu lí ài hō͘ i kihoē, hō͘ kakī kihoē toh oē-ēng--ê.

Chhoà Kimêng