大姊留落來 ê 笑容

**李勤岸** 相片內底 ê 大姊 穿白色ê衫，烏色 ê 長褲 輕輕、微微 ê 笑容 邊仔是媽媽、嘉宜、我 無tī 相片 ê 是 tī 頭前 hip-相 ê 諾諾 後壁是夏威夷 ê 海水 背景是Wakiki ê 高樓 三冬前 ê 大姊 chiah-ni̍h súi ê 大姊 看起來猶真青春美麗 ê 大姊 三冬前來美國人心目中 上súi ê 天堂chhōe 阮chhit-thô chit-má, 伊beh 去 koh khah súi ê 彼個天堂 阮搬來波士頓二冬啊 舊年大姊講明年春天 伊to̍h beh 來波士頓chhōe 阮 今年ê 春天khah 慢來 這陣五月拄好百花盛開 哈佛 ê 校園 花開 kah 親像花園 觀光客有真濟日本來--ê 阮那像攏會看著大姊 ê 形影 阮那像攏會聽著大姊 ê 聲 綿綿 ê 春雨 tī-teh 落 阮 giâ 雨傘出去看花 自從大姊癌症入院 春雨攏一直按呢 chha̍p-chha̍p 滴 杜鵑花、水仙花、Tulip 攏開 kah 真飽水啊 tī 雨水裡有一款淒涼 ê súi 大姊猶未來過哈佛校園 大本杜鵑 ê 花 大大蕊白色 ê 花 攏有大姊 ê 笑容 雨中，有大姊開朗 ê 笑聲 純潔 ê 水仙 一排一排ê 姊妹 身材好看 ê Tulip 一排一排 ê 姊妹 開 kah 真整齊真親密 逐蕊攏有大姊甘甜 ê 笑容 雨中，綿綿 ê 春雨中 那像有聽見大姊講話 ê 聲 昏迷 tī 病床 ê 大姊 teh 參阮講話 ê 聲 大姊軟弱幼細 ê 聲 哈佛 ê 校園春天真súi súi kah 那像花園 súi kah 那像天堂 大姊，猶未來過這個花園 大姊，猶未來過這個天堂 大姊，今仔日 beh 去 上súi ê 天堂 彼個四季攏有花ê 花園 阮攏會 tī 有花 ê 所在 看著天堂 看著大姊 siàu-念有花開一般ê 笑容 花開 i̍t-chi̍t般 ê 大姊 大姊自細漢hō͘ 阮ê 疼 逐蕊攏會tī 阮心內 ê 花園 開kah 足燦爛 親像春天逐時臨到 大姊 ê súi 大姊上súi ê 笑容 那像春天逐時臨到 大姊beh 去ê 彼個 上súi ê 天堂 mā 會逐時tiàm tī 阮心內 大姊，路中妳著kā 上帝 ê 手 牽 hō͘ 好勢 免 koh 回頭看阮 免 koh 煩惱阮啊 阮 mā 攏會 kā 上帝 ê 手 牽 hō͘ tiâu leh 阮敬疼 ê 大姊啊 請妳著放心 khôaⁿ-khôaⁿ 仔行 ---2003/5/30 Harvard

使用 MSN Messenger 與朋友在線上聊天 * * * * * * * * * * * * * * * * * * Li chu-chheh e e-mail khau-cho si: "Li khinhoann" . * Beh kia phoe ho' tak-ke tioh iong chit-e khau-cho chiah kia-e-kau. * * * * * * * * * * * * * * * * *