針對2016選舉予台文界ê公開批 by Chia Tekkhiam

From: uibun
Date: 2016-01-08 13:55:56

--------- 轉寄的郵件 ----------寄件者： Tek-Khiam Chia 針對2016選舉予台文界ê公開批   各位母語運動ê先進： 起頭，小弟欲對才過身ê瑞銘兄表達哀思，感謝伊之幾年為台文ê拍拼，m̄a提醒大家為台灣保重。   廿年前，瑞銘兄、阿仁kah阿惠喊著「愛母語，m̄是愛選舉」ê口號，由阿惠代表綠黨參選廢物國代。之是台文界為著確保主體性，追求獨立國家所做ê功德。當然，若是由1920年代ê台灣話文運動，抑是koh較進前ê白話文運動講起，咱民族ê拍拚已有數百年。之mā是咱接受歐洲由Martin Luther開啟ê母語運動(Vernacular movement)kah宗教改革(Reformation)建立國民國家(nation state)ê現代精神ê結果。   其實--，欲追求國家獨立愛對個人主體性ê建立開始，特別是愛確保個人無受干涉ê選擇權。亦就是講，只有以確保自由人ê權利與尊嚴才會建立個人ê主體性，m̄a才有可能完成國家獨立。總是--，茲ê--lóng是以掌握發言權kah資源做前提。為an-ne，現代國家除了確保個人ê自由權利，特別強調財產權。   對咱台灣人來講，戰後受蔣家匪偽中華民國殖民統治，mài講「二二八種族屠殺」之款無追訴權時效ê滔天大罪，咱絕大多數ê財產hông霸佔；對台灣ê事務咱m̄-niā無主導權、發言權，連講家己父母話ê自由亦受剝奪。受奴化ê結果致使真濟人放棄講母語ê權利，甘願講支那語，為支那人整體面。屆今(tan)，連音樂、電視、電影、廣播、商業、學術，全部予支那語霸占，就勿講是統治機器中心ê政治kah法律。共時，咱看著台語文化流失、資源衰減，台灣人愈來愈散phí-phí。連帶ê，有人自我否定；koh有一寡「走豬」自我thún踏，比加害者猶較夭壽。   當人類歷史進入西方紀元ê第三個千年，台語其實已行屆生死存亡ê地步。咱清楚，koh來可能是文化流失、民族滅亡。咱一定愛改變，除了為台語文拍拚，mā愛予社會各界了解之項事情(tāi-chì)有偌嚴重，叫醒大家寶惜台語。另外，咱愛決志做台灣ê主宰，掌握資源、決定資源、分配資源koh進一步創造資源；予台語一直生湠、傳(thn̂g)種，予台灣人永續發展。   為an-ne，咱無應該隨在無尊嚴、欠缺光榮感ê政客搓圓捏扁、損斷咱ê氣力。接續廿年前ê選舉，之回咱有張素華在台聯拍拚，只要有百萬政黨票，伊就會使在兩年後做立委，為台文kah台灣做貢獻。足濟人知素華一直為學運、社運、媒體解嚴、文化釘根kah台獨leh拍拚。講實在--ê，伊mā一直是在台文khoo-á內。當年，伊在TNT電台台長時代開台語師資班以外，koh自費做普查、結合立委遊說，衝出上千ê母語師資名額。之回，伊特別將「教育台灣化」文字化koh要求台聯列做政見，che當然包括台語文kah台獨在內。咱愛了解，台聯是唯一kā教育台灣化列做政見ê黨，mā是支那上刺鑿、代表李登輝先生ê黨。   台文界需要在蔣匪集團ê立法院有立委，an-ne咱才有法度爭取着資源。咱應該藉著之款改變，阻擋蔣匪集團結合支那徹底併吞台灣，進一步啟動台灣獨立進入最後ê實現階段。拜託各位先進予咱對支持台聯、支持素華入立法院開始，創造新機會，建立新ê可能性kah未來。 祝平安   Chia Tekkhiam(謝德謙) 敬上