咱 khah 贏守 ti Pennsylvania e 獨立軍！
咱 khah 贏守 ti Pennsylvania e 獨立軍！
From:
Date: 2008-01-13 22:04:31
咱過去對國民黨 tsit 隻天霸王毒 giâ-kang siunn 仁慈，phah 伊 phah 無死，tann koh sô 轉來 teh 展威，連 tsi̍t 點 á to 無 tsheh-pìnn，無要緊，咱 beh koh 戰，就 tsún 用 tsi̍t 世人 ê 時間， 咱 mā beh 戰 kah 咱歡頭喜面 kā 國民黨送山 hit 工為止！！！
列位 oh，咱 thang 來想 1776年 ê 秋天，George Washington tshuā 1 陣輸 kah hi-lè- lè，hông phah kah 親像 iap 尾狗 ê 軍隊 ná 戰 ná 走，ùi Long Island、New York City、 渡過 Hudson 河，逃入去 tī New Jersey 州。
Hit 當時獨立軍有影是輸 kah 褪褲，nā in ê 對敵英軍是裝備一度好，m̄-nā 有皇家 ê 部隊，koh 有猛勇 gâu 戰 ê 德國傭兵 tàu 陣，初出世 ê 美國國會 kap 人民 lóng 對獨立運動 ta̍uh-ta̍uh-á 失去信心，大部分 ê 人 mā 拒 絕 koh 加入軍隊，役期 beh 滿 ê 兵 á tsiâu 想 beh 退伍，m̄-nā 按呢，獨立軍 the̍h 無彈藥、糧食等等 ê 補給，美國國會發行 ê Continental money 直直薄--去，hit 款情況，真濟人 lóng mā lia̍h-tsún 獨立運 動 tshun 氣絲 á niā-tiānn，beh 妥當是緊 tsua̍h 慢 ê 代誌。十二月 tsi̍t-ē 到，退來 tī New Jersey 州 Princeton ê George Washington，kap 別支 kāng 款 hōo 英軍 phah 敗 ê 部隊 會齊，koh 向西南退去到 tann New Jersey ê Trenton，英軍 tī in 後 piah 是 jiok 緊緊，獨立軍只 好 koh 渡 Delaware 河，bih 去到 Pennsylvania，英軍 tsi̍t 路追趕，全無人 tú 敵，sûi koh 佔 Trenton，寒--人 beh 到--a，獨立軍目 tsiu 金金看英軍漸漸逼倚來到 Philidelphia－獨立運動 ê 心臟，獨立運 動 ná 像 tī 九降風--ni̍h khiā 蠟條，huh--tsi̍t-ē 就 beh hua--去-a，列位，想看 māi，咱 tsit-má，kám 有比 hit 當 tsūn ê 美國獨立軍 koh-khah 慘？
George Washington 知 beh 退 mā 無路-- a，伊 phāu thui 硬求勝 ê 決心，tī 12 月 22 kap 幾个將軍開會，按算利用英軍慶祝聖誕節守備 līng 鬆，tī 12 月 26 天 thiah-ha̍h ê 時發動反攻，iā hit 時登記 tī 伊手 ē ē 戰--得 ê 兵 mā tsiah 4,706 人 niā-tiānn。
聖誕節 e-poo 4 點天開始烏，獨立軍起行，beh 暗 á 天氣是 tsám-jiân-á bái，大風大雪 hōo 軍隊過河不止 á tshiân 手 tī-leh，有兩个兵 á tsuann-á 寒--死，tsiann 濟兵無鞋 thang 穿，kan-tann ē- tàng 用破布纏 kha，koh-khah 有兵 á 是 kui-khì 褪赤 kha 行 tī 冰雪頂 kuân，in 連長銃 to 因 為 kui 暝凍雪 bē phah--得，tio̍h 一直到透早 4 點，George Washington 所 tshuā ê 2 千 4 百外人、馬、kap 18 支大槓，tsiah 渡過Delaware 河。
26 號早起 8 點 hit-kha-tau，獨立軍來 tī Trenton 英軍 ê 營房附近，英軍因為大風雪撤除哨兵，無 pān- phue 風雪--ni̍h 雄雄 tsông 出獨立軍，無張無 tî kā phah tsi̍t-ē 是倒籬顛倒，Washington 代先已 經 kā 大摃 hē tiàm ē-tàng 控制兩條主要街路 ê kuân-phiânn，hōo 德國傭兵 (Hessians) 無才調會 整，hông 圍 tī 城內 ê 英國兵收 bē 著清楚 ê 命令，主要 ê 兩陣軍力散--去，1 陣走去城外 ê phōng 果園，相整合了 後攻入城，suah tī 城內 hōo 獨立軍 kap khiā-ke ùi kuân 位 kap iap-thiap ê 所在攻擊，主帥 tio̍h 傷，kha 手 la̍k-la̍k-tshuah 緊 beh 退，尾--a hōo 獨立軍圍 tiâu leh tsuann-á 投降，另外 1 陣英軍想步逃向南，大部分 mā 去 hōo 獨立軍 tsang--著，約其略有 600 个德國傭兵 suan 有去，活 lia̍h 868 人，106 人 tio̍h 傷 iah 戰死；美軍 tsit pîng 有 4 个人戰死，3 个人寒--死，m̄-koh 接收武器上千支，大摃幾 ā 座，兼有糧食彈藥等等 ê 補給品，雖然過程 tsiah 90 分鐘，m̄-koh suah 變做美國獨立運動 ê 轉換點，美國 ê 歷史 mā 自按呢改變！
獨立軍 hit 了後趁勝追擊，tī 正--月初 2、初 3 兩工，koh tī Princeton 大贏英軍，kā 英軍趕出 New Jersey，切斷英軍 ê 補給線，美國大眾 kā 對獨立運動 ê 信心恢復，重 koh 傳鑼召兵組織軍隊，戰贏英國，tsiânn 做獨立 ê 國家。
Hit 場前前後後 90 分鐘 ê 戰役，美國史號做 The Battle of Trenton，1776 年 12 月 25 到 1777 年正--月初 3 ，美國歷史家 kā 叫做「關鍵十日」(Ten Crucial Days)，George Washington mā kā 1776年 ê 聖誕節，號做『美國 ê 頭 tsi̍t-ê 聖誕』 (The First American Christmas)。
列位有志，tann 咱 ná 親像守 tī Pennsylvania ê 獨立軍，雖 bóng 前途看--來百面是死路 1 條，總--是咱 m̄-thang 失志，咱 iáu 無 Washington in 環境 hiah bái，條件 mā khah 好--in，咱定著有機會反 攻，tī 後--日做伙慶祝咱出尾 ê 勝利！